სესკ ფაბრეგასი

ფრანსესკ „სესკ“ ფაბრეგასი (კატ. Francesc Fàbregas i Soler; დ. 4 მაისი, 1987, არენის-დე-მარი, კატალონია, ესპანეთი) — ესპანელი ფეხბურთელი და ფეხბურთის მწვრთნელი. თამაშობდა ნახევარმცველის პოზიციაზე. 2010 წლის მსოფლიო ჩემპიონი და 2008–2012 წლების ევროპის ორგზის ჩემპიონი ესპანეთის ეროვნული ნაკრების შემადგენლობაში. 2024 წლიდან იტალიური „კომოს“ მთავარი მწვრთნელი.

საკლუბო კარიერა

„არსენალში“ გადასვლამდე ფაბრეგასმა 17 წლამდე ნაკრებების ტურნირში მიიღო მონაწილეობა, სადაც არაერთხელ გამოიჩინა თავი - „ადიდასისა“ და ტურნირის ოქროს ბუცები მოიგო, როგორც ბომბარდირმა და ტურნირის საუკეთესო მოთამაშემ, მისმა ნაკრებმა კი მეორე ადგილი დაიკავა ბრაზილიელთა შემდეგ.

კლუბში სესკის დებიუტი ლიგის თასის თამაშში შედგა „როტერჰემ იუნაიტედთან“; ამ გამოსვლით იგი ასევე „არსენალის“ ყველაზე ახალგაზრდა დებიუტანტი გახდა. იმ მატჩშიც სესკს მოედანი უშედეგოდ არ დაუტოვებია - ზუსტად შეასრულა თავისი დარტყმა პენალტების სერიაში. ამის შემდეგ, ლიგის თასის მოგვიანებით ეტაპზე მან თამაშიდანაც გაიტანა „ვულვერჰემპტონთან“. ფაბრეგასს 2004-2005 სეზონამდე არ დაუწყია ძირითად შემადგენლობაში რეგულარულად გამოსვლა - პირველი შემთხვევა „მანჩესტერ იუნაიტედთან“ დაფიქსირდა ინგლისის სუპერთასის მატჩში, ამას კი მიყოლებით ოთხი გამოსვლა მოჰყვა პრემიერლიგის შეხვედრებში „ევერტონთან“, „მიდლსბროსთან“, „ბლექბერნთან“ და „ნორიჯთან“. ფრანსესკმა ბევრი გააკვირვა ამ თამაშებში („ბლექბერნთან“ მან გოლიც გაიტანა), შემდეგ კი ჩემპიონთა ლიგაშიც გამოიჩინა თავი „როსენბორგთან“ გატანილი გოლით.

ამას ლონდონელებთან ახალი კონტრაქტის გაფორმება მოჰყვა, რომლის თანახმადაც სესკი „არსენალის“ საკუთრება იყო 2011 წლამდე. გუნდიდან პატრიკ ვიეირას წასვლის შემდეგ ესპანელმა მყარი ადგილი მოიპოვა ნახევარდაცვაში და 2005-2006 სეზონის დასაწყისიდანვე ხშირად გამოდიოდა ძირითადში; სესკს არც გოლების შეგდება დავიწყებია - გაუტანა „ბლექბერნსა“ და „ფულემს“ პრემიერლიგაში, თუმცა ყველაზე მეტად შესამჩნევი მისი თამაში ჩემპიონთა ლიგაში იყო - ჯერ „რეალ მადრიდთან“, შემდეგ კი „იუვენტუსთან“ ნახევარფინალში, სადაც ფაბრეგასი საგოლე პასისა და გოლის ავტორი იყო - მან და ტიერი ანრიმ ორჯერ გაითამაშეს საგოლე კომბინაცია, როდესაც ჯერ ფრანგმა გაატანინა ფრანსესკს, შემდეგ კი როლები გაცვალეს და უკვე სესკი იყო ანრის ასისტენტი.

სანაკრებო კარიერა

ნაკრებში ფაბრეგასმა პირველი თამაში 2006 წლის 1 მარტს ჩაატარა, როდესაც დავიდ ვილიამ სწორედ მისი პასით გაუტანა კოტ დ'ივუარს.

სანაკრებო სტატისტიკა

ეროვნული ნაკრები	წელი	მატჩი	გოლი
ესპანეთი ესპანეთის დროშა	2006	14	0
	2007	8	0
	2008	15	1
	2009	10	4
	2010	11	1
	2011	4	2
	2012	13	3
	2013	11	2
	2014	8	0
	2015	7	1
	2016	9	1
ჯამში		110	15

რესურსები ინტერნეტში

• ოფიციალური საიტი
• სესკ ფაბრეგასი Instagram-ზე
• Twitter-ზე